गावाची  एकूण कुटुंबसंख्या १२३३ असून त्यापैकी दारिद्य्ररेषेखाली कुटुंब संख्या ८९७ आहे. ग्रामपंचायत कार्यक्षेत्रात ९९% लोकसंख्या आदिवासी समाजाची असून विखुरलेल्या स्वरुपात वस्ती आहे.गावातील आदिवासी समाजात मुलगा व मुलगी असा भेदभाव न करता मुलगा व मुलगी यांचेकडे  समानतेनेबघितले जाते. गावात स्त्रीभ्रूण हत्तेचे प्रमाण 0% आहे.त्याचेच उदाहरण म्हणून गावातील एकूण महिलांचे प्रमाण सरासरी ५२%आहे.गावातील बहुतांश आदिवासी-वारली समाजाची लोकवस्ती असून काहीप्रमाणात आदिवासी-कातकरी समाजची लोकवस्ती आहे.गावात पारंपारिक पद्धतीने धवलेरींच्या मार्फत लग्न विधी पार पाडले जातात तर लग्नामध्ये हुंडा देणे ही प्रथा नाही.दरवर्षी गावात गावदेव,रवाल,दिवाळी व जागतिक आदिवासी दिन मोठ्या उत्साहात साजरे केले जातात.सणउत्सवामध्येपारंपारिक वाद्य जसेतारपा,तूर,रोही,सांबळ यासारखे वाद्य वाजवून नृत्य केले जाते.सर्व नृत्य सामुहिकरित्या केले जात असल्याने गावात नृत्यांमधून सामुहीकतेचे दर्शन घडते.

ग्रामपंचायत कार्यक्षेत्रातील कुटुंबाचा भातशेती मुख्य व्यवसाय आहे.भात पिकाबरोबरच तूर,उडीद,चवळी,ज्वारीची पिके घेतली जातात. तसेच शेतीला जोडधंदा म्हणून शेळीपालन,भाजीपाला लागवड,आंबा,काजू,चिकू लागवडीमधून बागायती पिक घेण्याकडे शेतकर्यांचा कल वाढलेला आहे. ग्रामपंचायत पासून उंबरगाव (गुजरात) या ठिकाणी मुबलक उद्योग, कारखाने असल्याने गावातील तरूण-तरुणी उंबरगाव येथील कंपनीत नोकरीला जाण्याचे प्रमाण अधिक आहे.